Ի՞նչ է սրտամկանի ինֆարկտը, ո՞ր նշանների դեպքում դիմել բժշկին և ինչպե՞ս խուսափել ամենատարածված հիվանդություններից մեկից պարզել ենք սրտաբան Աննա Սարգսյանից։ Մեզ հետ զրույցում նա նշեց, որ սրտամկանի սուր ինֆարկտը և ընդհանրապես սրտի իշեմիկ հիվանդությունը նույնիսկ Covid 19-ի պայմաններում միևնույն է, մնում է աշխարհում մահացության առաջին պատճառներից մեկը։
«Սրտամկանի սուր ինֆարկտը սրտամկանի սուր վնասումն է, որի հիմնական պատճառը սիրտ-անոթային համակարգում անոթային ախտահարման արդյունք է, այսինքն՝ սրտամկանի անոթները ինչ-ինչ պատճառներով նեղանում են և փակվում։ Բնականաբար, այն կարող է լինել հիմնականում աթերոսկրելոզի արդյունք»,-նշել է սրտաբանը։
Նա անդրադարձավ հարցին, թե ինչպե՞ս կանխարգելել և ինչպե՞ս իմանալ սրտամկանի ինֆարկտի նշանների մասին․«Առաջին հերթին դա կրծքավանդակի բութ կամ այրող ցավերն են, որոնք բավականին ինտենսիվ են և երկար են տևում։ Այս նշաններն ահազանգ են, որ դուք շտապ դիմեք բժշկին։ Սրտամկանի ինֆարկտի մեկ այլ ախտանշաններից առիթմիաներն են և եթե Ձեզ մոտ սկսվել է սուր անկանոն սրտամկանի աշխատանք կամ սրտի աշխատանք, նշանակում է այնտեղ կա ինչ-որ ահազանգ և պետք է դիմել բժշկի»։
Սրտաբանի խոսքով՝ առաջնային կարևոր է ժառանգական նախատրամադրվածության գործոնը։
«Սրտամկանի հիվանդությունները, սրտամկանի ինֆարկտը բավականին երիտասարդացել են և պետք է սովորել վաղ շրջանում ուշադրություն դարձնել իրենց հիվանդությանը։ Եվ հնարավորինս պարտաճանաչ հետազոտվել բժշկի մոտ՝ կանխարգելելու համար»,-ասաց բժիշկը։
Սրտաբանը նշեց, որ տնային պայմաններում սրտամկանի ինֆարկտի բուժման ոչ մի առաջարկ իրենց կողմից չի կարող լինել։ Իսկ առաջին բուժօգնություն ցույց տալու համար պետք է հիվանդին անշարժացնել է և արագ շտապօգնությանը դիմել։
«Սրտամկանի սուր ինֆարկտից խուսափելու համար առաջին հերթին պետք է պարբերաբար դիմել բժշկին և հետազոտվել։ Եվ սա ամենափոքր ախտանշանների դեպքում, իսկ դա կարող է լինել՝ կրծքավանդակի ցավը՝ հատկապես ֆիզիկական ծանրաբեռնվածության ժամանակ, սրտի շրջանի ցավը՝ զարկերակային ճնշման բարձրացման ժամանակ, տարբեր տիպի առիթմիաների դրսևորումը։ Վերընշվածներն ահազանգ են որպեսզի դիմեն բժշկին, հետազոտվեն և սրանով իսկ կանխարգելեն սրտամկանի ինֆարկտի առաջացումը»,-նշել է սրտաբանը։
Զրույցի ընթացքում բժիշկը նաև նշեց, որ, ցավոք սրտի, կա տենդենց, երբ բժիշկը նշանակում է բուժումները և հիվանդը մի փոքր իր վիճակի բարելավվում տեսնելով՝ ինքնուրույն ընդհատում է դեղորայքի ընդունումը, որը խիստ վտանգավոր է․«Սա նույնպես վտանգավոր է, որովհետև սրտամկանի սուր ինֆարկտի կանխարգելումը պետք է մշտապես լինի բժշկի հսկողության տակ։ Եվ խնդրանք՝ ինքնուրույն մի ընդհատեք Ձեր դեղորայքային բուժումը, այլ դիմեք Ձեր բժշկին, ով կորոշի ինչ փոփոխություններ անել բուժման մեջ»։
Լուսինե Մարդոյան
