Մոր և մանկան առողջության պահպանման գիտահետազոտական կենտրոնում մարտի 7-ին տեղի ունեցավ Վանաձորում խորը անհասությամբ ծնված փոքրիկ Անդրեյի դուրսգրումը:
Լուսանկարները` Մխիթար Խաչատրյանի
«Արմենպրես»-ի փոխանցմամբ՝ փոքրիկի դուրսգրմանը ներկա էր առողջապահության նախարար Անահիտ Ավանեսյանը:
Նա նշեց, որ դեպքը եզակի է` ցածր քաշով և գեստացիոն վաղ ժամկետում երեխայի ապրելիության և հետագայում առողջական որևէ խնդիր չունենալու առումով:
«Ի ուրախություն մեզ բոլորիս մենք այսօր դուրս ենք գրում ցածր քաշով և ժամկետից բավականին շուտ ծնված բալիկին, որը տեղափոխվել է այստեղ Վանաձորից և այս ամբողջ ընթացքում գտնվել է բժիշկների խիստ վերահսկողության տակ: Մեր բժիշկների կողմից անցկացվել են բոլոր անհրաժեշտ միջամտությունները, և կարող ենք ասել, որ այսօր փոքրիկին առողջ վիճակում ճանապարհում ենք տուն»,-ասաց Ավանեսյանը:
Մոր և մանկան առողջության պահպանման գիտահետազոտական կենտրոնի փոխտնօրեն Արմեն Գասպարյանը նշեց, որ երեխան հոկտեմբերի 21-ին Մուրացանի հիվանդանոցից տեղափոխվել է իրենց մոտ 540 գրամ քաշով և 23 շաբաթ 3 օր հղիության ժամկետով ծնված: «Երեխան ապրեց մեր հիվանդանոցում 137 օր, ճանապարհը շատ դժվար էր և՛ բժիշկների, և՛ երեխայի համար: Ասեմ, որ էքստրեմալ ցածր քաշով երեխաների մոտ բարդությունների տոկոսը նույնպես բարձր է, բայց ի շնորհիվ մեր պրոֆեսիոնալ թիմի հաջողվեց խուսափել բոլոր բարդություններից»,-ասաց նա:
Հիվանդանոցի փոխտնօրենը նշեց, որ հիվանդանոց ընդունվելիս փոքրիկի վիճակը գնահատվել է ծայրահեղ ծանր, ինչը բնորոշ է նման ցածր քաշ ունեցող երեխաներին: Նա գրեթե մեկ ամիս եղել է միացված թոքերի արհեստական շնչառության սարքին և ինքնուրույն չի կարողացել շնչել: Իսկ այսօր արդեն փոքրիկը դուրս է գրվում 3 կիլոգրամ 700 գրամ քաշով:
Երեխայիմայրիկը՝ Մարիա Չիչովան, ասաց, որ իրենք երկար էի սպասել այս երջանիկ օրվան, որ կարողանային իրենց առողջ փոքրիկի հետ գնալ տուն: Նա նշեց, որ ի սկզբանե հավատում էր, որ ամեն ինչ շատ լավ է լինելու: Փոքրիկ Անդրեյը ընտանիքի 4-րդ բալիկն է:
