Վրաստանի քաղաքացիների համար կորոնավիրուսի էքսպրես թեստավորումն անվճար է: Վրաստանի քաղաքացիների էքսպրես-թեստավորումը COVID-19-ի համար ֆինանսավորվում է պետական ծրագրով և պետք է անվճար լինի երկրի բոլոր բժշկական հաստատություններում։ Այս մասին ասվում է Վրաստանի առողջապահության նախարարության հաղորդագրության մեջ, փոխանցում է apsny.ge-ն։
Առողջապահության նախարարությունը հայտարարություն է տարածել այն բանից հետո, երբ Facebook-ի վրացական հատվածը սկսել է տեղեկատվություն տարածել, որ երկրի որոշ բուժհաստատություններ վճար են պահանջում։
«Արագ հակագենային թեստով բնակչության հետազոտությունները ենթակա են ֆինանսավորման՝ կառավարության ծրագրերով սահմանված կանոններին համապատասխան։ Ծրագրին մասնակցող հաստատությունները պետք է ապահովեն, որ անհատները հետազոտվեն արագ հակագենային թեստով՝ առանց նրանցից վճար գանձելու»,-հայտնել են Առողջապահության նախարարությունից։
Նախարարությունը քաղաքացիներին հորդորել է դիմել Բժշկական և դեղագործական գործունեությունը կարգավորող գործակալություն այն դեպքում, եթե նրանք, այնուամենայնիվ, վճարել են ծառայության դիմաց։
