Թոքերի քաղցկեղի նշանները կարող են երեւալ մարդու մարմնի տարբեր մասերում, հավաստիացնում են բրիտանական Cancer Research UK կազմակերպության մասնագետները։
Նրանց խոսքով՝ այդ ծանր հիվանդությունը սովորաբար վաղ նշաններ չի ունենում, բայց քաղցկեղի զարգացման ընթացքում ախտանշանները ավելի նկատելի են դառնում։
Ամենատարածված ախտանշաններ են համարվում հազը, որը չի անցնում 3 եւ ավելի շաբաթ, ինչպես նաեւ կրծքավանդակի վարակները, որոնք կրկին առաջ են գալիս դեռ նոր ապաքինվելուց հետո։ Թոքերի քաղցկեղի հնարավոր դրսեւորումներից են նաեւ հեւոցը եւ ցավը հազալիս կամ շնչելիս։
Ինչ վերաբերում է թոքերի քաղցկեղի դրսեւորումներին մարմնի տարբեր մասերում, պացիենտի մոտ կարող են առաջ գալ պարանոցի կամ դեմքի այտուց, ցավ կլլելու ժամանակ կամ կլլման դժվարացում, ուսերի կամ կրծքի ցավ, ինչպես նաեւ մատների արտաքին տեսքի փոփոխություն, որոնք սկսում են հիշեցնել թմբուկի փայտիկներ ծայրերի հաստացման պատճառով։
