Խնձորն ու տանձը կարող են օգտակար լինել ավելորդ քաշի դեմ պայքարում: Այսպիսի կարծիք է հայտնել բրիտանացի սննդաբան Լիլի Սաութերը:
Ըստ Brinkwire-ի՝ մասնագետը կարծում է, որ եթե նիհարել ցանկացող մարդը ավելի շատ միրգ ու բանջարեղեն ուտի, նա իրեն ավելի երկար կուշտ կզգա, թեեւ օրվա ընթացքում ավելի քիչ կալորիա կստանա:
Առավել օգտակար մրգեր Սաութերը համարում է խնձորն ու տանձը: Ընդամենը մեկ տանձն, ըստ սննդաբանի, ապահովում է բջջանյութի օրական նորմայի մինչեւ 20%-ը: Բացի այդ, տանձը հարուստ է հակաօքսիդիչներով եւ օգտակար քիմիական նյութերով:
Ինչ վերաբերում է խնձորին, մեկ խնձորը պարունակում է ընդամենը մոտ 77 կալորիա, մինչդեռ նիհարողների շրջանում հանրաճանաչ հացահատիկային բատոնները պարունակում են 150 կալորիա:
Մասնագետը խորհուրդ է տալիս որպես առողջ խորտիկ օգտագործել խնձորն ու տանձը: Նրա կարծիքով, այս մրգերը շատ կարեւոր դեր ունեն դիետիկ սննդակարգում, քանի որ պարունակում են մեծ քանակությամբ բջջանյութ եւ նպաստում են արյան մեջ գլյուկոզայի մակարդակի նորմալացմանը: Դրա շնորհիվ նիհարողն ավելի երկար է իրեն կուշտ զգում, եւ քաղցրավենիքի կարիքը նվազում է:
Սաութերը խորհուրդ է տվել նաեւ տանձն ուտել կեղեւով, քանի որ հենց դրանում է պարունակվում հակաօքսիդիչների առավելագույն քանակը:
