Առողջապահության նախարար Անահիտ Ավանեսյանը լրագրողների հետ զրույցում անդրադարձել է դիահերձարաններից նույնականացված մարմինները չվերցնելու խնդրին։
Նա նշել է, որ եթե հարազատները չվերցնեն նույնականացված դիերը դիահերձարաններից, դրանց հուղարկավորությունը կազմակերպելու պատասխանատվությունը կվերցնի իր վրա պետությունը:
Նրա խոսքով, դիակները չեն կարող երկար ժամանակ պահպանվել դիահերձարաններում, անգամ սառնարաններում: Այս ցավոտ հարցը լուծելու ուղղությամբ մի ամբողջ թիմ է աշխատում:
«Եթե կլինեն անձինք, ովքեր անհեռանկար ձեւով կձգձգեն պրոցեսը, պետությունը իր վրա պիտի վերցնի պատասխանատվություն նաեւ հուղարկավորությունը կազմակերպելու, որովհետեւ որեւէ տեսանկյունից ճիշտ չի այդքան երկար ժամանակով պահելը», — ասաց Անահիտ Ավանեսյանը:
Ավանեսյանի փոխանցմամբ՝ այս պահին քննարկումներ են ընթանում ՊՆ-ի եւ այլ ինստիտուտների ներկայացուցիչների հետ: