Քաղցկեղը ներկայում ամենատարածված ու վտանգավոր հիվանդություններից մեկն է, որը տարեկան հազարավոր մարդկանց մահվան պատճառ է դառնում։ Այս հիվանդությունը կարող է ախտահարել գրեթե բոլոր օրգաններն ու հյուսվածքները և ախտորոշվել ինչպես կանանց, այնպես էլ տղամարդկանց մոտ։ Սա դասվում է այն հիվանդությունների շարքին, որոնց բարեհաջող բուժման հավանականությունը կախված է լինում վաղ ախտորոշումից, սակայն անգամ ժամանակին ախտորոշելու դեպքում երբեմն չի հաջողվում խուսափել լուրջ հետևանքներից կամ անգամ մահվան ելքից։
Նման խնդիրներից խուսափելու համար հարկավոր է ժամանակին միջոցներ ձեռնարկել հիվանդության կանխարգելման համար, ուստի ուռուցքաբան-քիմիաթերապևտ Անդրեյ Բազիլևը 5-tv.ru-ի հետ զրույցում նշել է այն սովորություները, որոնք կարող են նվազեցնել ուղիղ աղիքի քաղցկեղի և հաստ աղիքի քաղցկեղի զարգացման հավանականությունը։
«Հարկավոր է բալանսավորված սնվել, սահմանափակել ալկոհոլի գործածությունն ու այլ վնասակար սովորությունները և ավելի շատ հանգստանալ։ Այս ամենը թույլ կտա նվազեցնել կոլոռեկտալ քաղցկեղի զարգացման հավանականությունը բոլոր դեպքերում», — ասել է Բազիլևը։
Մասնագետը նաև նշել է, որ չի կարելի վստահել այն հետազոտություններին, որոնք թերագնահատում են ալկոհոլի գործածության նշանակությունը քաղցկեղի զարգացման գործընթացում։ Նրա խոսքով՝ մարդը կարող է ալկոհոլ չօգտագործել, սակայն ընդունել սպիրտ պարունակող դեղորայք կամ ալկոհոլի ցածր պարունակությամբ ըմպելիքներ, ուստի նման հետազոտությունների եզրակացություններն ամբողջությամբ չեն համապատասխանում իրականությանը։