«Այս պահին դեղատներում բժշկական դիմակները բացակայում են, բայց դա հավելյալ խուճապի արդյունքն է, երբ մարդիկ դիմակ են պահեստավորում իրենց տանը։ Սա անիմաստ է, ասեմ ավելին՝ դիմակը 100%-ով չի պաշտպանում վարակից»,- իր ճեպազրույցի ժամանակ ասել է ԱԺ Առողջապահության և սոցիալական հարցերի հանձնաժողովի նախագահ Նարեկ Զեյնալյանը։
«Մենք ունենք բավականչափ պահեստավորված դիմակներ։ Եվ բացառելու ենք, որ որևէ դեղորայքի կամ բժշկական դիմակի թանկացում լինի»,-ընդգծել է Զեյնալյանը։
Նա նշեց, որ տարբերություն կա էմոցիոնալ ֆոնի ներքո հայտարարարություններ անելու, ժողովրդի մեջ խուճապ տարածելու և ստացված տվյալների հստակ վերլուծության հիման վրա որոշում կայացնելու մեջ։
«Պետք է այս երկուսի կարևորությունը հասկանալ, քանի որ հավելյալ խուճապը վերահսկողությունից հանելու է ամեն ինչ։ Նորից նշեմ, որ սահմանը փակելու որոշումը կայացվել է տվյալների վորլուծության արդյունքում, իսկ մնացածը էմոցիոնալ դաշտից է»,- հավելել է Նարեկ Զեյնալյանն՝ անդրադառնալով կառավարության կայացրած որոշման և Արսեն Թորոսյանի տեսանկյան հակասությանը։
Նա բավարար չգնահատեց Առողջապահության նախարարության աշխատանքը ժողովրդին նոր կորոնավիրուսի մասին իրազեկելու քայլերը։
«Կարծում եմ՝ նախարարությունը կարող էր ավելի ինտենսիվ հոսքով ինֆորմացնել հանրությանը՝ խուճապը մեղմելու նպատակով»։