Առողջապահության նախարարության ղեկավար Միխայիլ Մուրաշկոն շնորհակալություն է հայտնել այն բժիշկներին, ովքեր Բլագովեշչենսկում սրտի կենտրոնի այրվող շենքում ավարտել են բաց սրտի վիրահատությունը: Մինչ կլինիկայի տանիքն այրվում էր, այդ ժամանակ վիրաբուժական սենյակներից մեկում վիրաբույժները կատարել են աորտակորոնար շունտավորում, իսկ հրշեջները փորձել են կանխել ծխի և ջրի մուտքը շենքի այս հատված:
Հրդեհի պահին հիվանդանոցում տասնյակ հիվանդներ են եղել, այդ թվում՝ ծանր վիճակում գտնվողները: Անձնակազմը, չնայած բացառիկ հանգամանքներին, աշխատել է հստակ և ներդաշնակ, տարհանումը տեղի է ունեցել՝ պահպանելով անվտանգության բոլոր պահանջները: Մինչ ոմանք դուրս էին բերում մարդկանց, մյուսները կրակից փրկում էին բժշկական սարքավորումները և կենսական նշանակություն ունեցող դեղամիջոցները:
Ամենաբարձր պրոֆեսիոնալիզմն ու հանգստությունն են ցուցաբերել այն բժիշկները, որոնք, չնայած կրակին, շարունակել են կատարել սրտի ամենաբարդ վիրահատությունը: Կարդիոխիրուրգների խոսքով՝ այն անհնար էր դադարեցնել: Արդյունքում, տղամարդը հաջողությամբ վիրահատվել է և հսկողության տակ տեղափոխվել է տարածաշրջանային կլինիկական հիվանդանոց:
Հրդեհը մարվել է միայն 3,5 ժամ հետո: Հրշեջ լաբորատորիայի փորձագետները սկսել են աշխատել արտակարգ իրավիճակի վայրում: Նախնական վարկածի համաձայն՝ հրդեհի պատճառ կարող էին դառնալ անսարք էլեկտրական լարերը: Դատախազության աշխատակիցները պարզում են, թե որքան խնամքով են իրականացվել հրդեհային անվտանգության միջոցառումները: