Կոկորդի ցավը շնչառական համակարգի հիվանդություններին բնորոշ ամենատարածված ախտանշաններից մեկն է, սակայն այն կարող է հանդես գալ նաև որպես առանձին խնդիր: Նման ցավը բավական տհաճ է և խիստ բացասաբար է անդրադառնում կյանքի որակի վրա՝ թույլ չտալով ինչպես հարկն է կատարել անհրաժեշտ գործերը, ուստի զարմանալի չէ, որ առաջին իսկ տհաճ զգացողության դեպքում մարդիկ փորձում են հնարավորինս շուտ ազատվել դրանից:
Կոկորդի ցավի դեմ պայքարում, որպես կանոն, կիրառվում են տարատեսակ դեղամիջոցներ, բուժիչ օշարակներ կամ սառնաշաքարներ, որոնք սակայն ոչ միշտ են բավական արդյունավետ լինում, իսկ երբեմն էլ մի շարք կողմնակի բարդություններ են առաջացնում, քանի որ պարունակում են վնասակար քիմիական տարրեր, սակայն, բարեբախտաբար, նմանատիպ ազդեցությամբ օժտված դեղամիջոցներ կարելի է պատրաստել նաև ինքնուրույն՝ օգտագործելով միայն բնական բաղադրիչներ, որոնք ոչ միայն ավելի արդյունավետ են, այլև շատ ավելի հասանելի են ու անվնաս։
Ձեր ուշադրությանն ենք ներկայացնում մի քանի պարզ, արդյունավետ ու փորձված ժողովրդական միջոց, որոնք կօգնեն հեշտությամբ մեղմել կոկորդի ցավն ու կազատեն տհաճ զգացողություններից։
- 2։1 հարաբերակցությամբ խառնել լորենու ծաղիկներն ու եղեսպակը, այնուհետև ստացված խառնուրդի 2 ճաշի գդալին ավելացնել մի բաժակ եռման ջուր ու թրմել 20 րոպե։ Ստացված թուրմը քամել ու օգտագործել օրական մի քանի անգամ կոկորդի ողողումներ անելու համար։
- 2։3 հարաբերակցությամբ խառնել լորենու ծաղիկներն ու երիցուկի ծաղիկները, այնուհետև ստացված խառնուրդի 2 ճաշի գդալին ավելացնել մի բաժակ եռման ջուր ու թրմել 20 րոպե։ Ստացված թուրմը քամել ու օգտագործել կոկորդի ողողումներ անելու համար։
- 100 գրամ սառեցրած կամ թարմ չիչխանի հատապտուղները տրորել ու խյուս դարձնել, ավելացնել 1 բաժակ եռման ջուր, թողնել հեղուկի մի փոքր սառչի, այնուհետև քամել։ Ստացված համեղ ու օգտակար ըմպելիքը հարկավոր է մանր կումերով խմել։
- Մեկ կիտրոնի հյութը քամել, ավելացնել 1 բաժակ ջուր, այնուհետև քաղցրացնել խառնուրդը մեղրով և խմել օրվա ընթացքում որպես թեյ։
- Քամել 3 կիտրոնի հյութն ու խառնել այն մի բաժակ բնական մեղրին, այնուհետև ստացված խառնուրդն ընդունել օրական 3-4 անգամ կոկորդի ցավը մեղմելու համար։ Հարկավոր է 1 թեյի գդալ խառնուրդը դնել լեզվին ու շատ դանդաղ այն կուլ տալ (սառնաշաքարի նման)։
- Մի բաժակ եռացրած գոլ ջրում լուծել 1 թեյի գդալ կերակրի սոդա ու 1 թեյի գդալ կերակրի աղ, ավելացնել 1 հավկիթի սպիտակուց ու լավ խառնել։ Ստացված հեղուկն օգտագործել կոկորդի ողողումներ անելու համար։
- Մի բաժակ եռացրած գոլ ջրում լուծել 1 թեյի գդալ կերակրի սոդա, 1 թեյի գդալ կերակրի աղ ու 3 կաթիլ յոդ, այնուհետև ստացված լուծույթն օգտագործել կոկորդի ողողումներ անելու համար։
- 1 ճաշի գդալ չորացրած եղեսպակին ավելացնել մի բաժակ եռման ջուր, դնել տարան թույլ կրակին ու եփել 15 րոպե։ Թողնել եփուկ թրմվի ևս 45 րոպե, այնուհետև քամել ու օգտագործել գոլ հեղուկը յուրաքանչյուր 2 ժամը մեկ կոկորդի ողողումներ անելու համար։
- Խառնել 1 ճաշի գդալ երիցուկի չորացրած ծաղիկները, 1 ճաշի գդալ նվենու (էվկալիպտ) տերևներն ու 1 ճաշի գդալ վաղենակի ծաղիկները, այնուհետև ստացված խառնուրդին ավելացնել 1 բաժակ եռման ջուր ու թրմել մեկ ժամ։ Ստացված թուրմը հարկավոր է կիրառել գոլ վիճակում կոկորդի ողողումներ անելու համար։
- 1 թեյի գդալ սոճու փշատերևներին ու նույն քանակությամբ դեղատնային երիցուկի չոր ծաղիկներին ավելացնել 1 բաժակ եռման ջուր և թրմել կես ժամ, այնուհետև ստացված թուրմն օգտագործել բուժիչ ինհալացիաների համար։
Այս բնական միջոցները շատ պարզ են ու արդյունավետ և օգնում են շատ արագ ազատվել կոկորդի ցավից ու տհաճ զգացողություններից, սակայն հարկ է հիշել, որ որոշ դեպքերում նման ցավը կարող է պայմանավորված լինել առողջական լուրջ խնդիրներով, ուստի նման միջոցները կարելի է կիրառել բացառապես մասնագետի հետ խորհրդակցելուց ու անհրաժեշտ բուժզննումն անցնելուց հետո։ Ոչ մի դեպքում չի կարելի զբաղվել ինքնաբուժությամբ, քանի որ դա կարող է շատ վտանգավոր լինել ու լուրջ բարդություններ առաջացնել: Բացի այդ, միայն փորձառու մասնագետը կկարողանա պարզել կոկորդի ցավի հիմնական պատճառն ու նշանակել անհրաժեշտ բուժումը, որը կլինի արդյունավետ ու չի առաջացնի կողմնակի բարդություններ:
Նյութի աղբյուրը՝ aif.ru
