ՁԻԱՀ-ի կանխարգելման հանրապետական կենտրոնը հայտարարություն է տարածել կենտրոնը «Նորք» ինֆեկցիոն կլինիկական հիվանդանոցին միացնելու մասին առողջապահության նախարարության պարզաբանման վերաբերյալ։
«Ըստ առողջապահության նախարարության՝ որոշումն ուղղված է ծառայությունների ինտեգրմանը:
Համաձայն Առողջապահության համաշխարհային կազմակերպության (ԱՀԿ)՝ ՄԻԱՎ վարակով պացիենտներին տրամադրվող երկարատև օգնությունը պահանջում է նրանց համակողմանի և հաջորդական վարման նպատակով համապատասխան ծառայությունների ինտեգրում և համագործակցություն՝ ներառյալ մեկ տեղում ծառայությունների տրամադրումը և տեղեկատվության փոխանակման ու նեղ մասնագիտացված օգնության համար այլ բուժհաստատություններ ուղեգրման գործող արդյունավետ համակարգերը:
Ընդհանուր առմամբ, ինտեգրված ծառայությունները նորամուծություն չեն երկրի առողջապահական համակարգի համար: Երկրում ստեղծվել և գործում է ՄԻԱՎ/ՁԻԱՀ-ի, տուբերկուլոզի, մոր և մանկան առողջության պահպանման ծառայությունների սերտորեն ինտեգրված համակարգ, որն ապահովում է հիվանդությունների վաղ ախտորոշում, բոլոր կարիք ունեցողներին որակյալ բժշկական օգնության և սպասարկման, արդյունավետ բուժման և բժշկական այլ ծառայությունների տրամադրում:
Հայաստանը հասել է ՄԻԱՎ վարակին առնչվող ծառայությունների ինտեգրման այնպիսի մակարդակի, ինչը դժվար է տեսնել ԱՀԿ-ի եվրոպական տարածաշրջանի արևելյան մասում. սա արձանագրվել է 2016թ. ԱՀԿ-ի և ՄԱԿ-ի ՄԻԱՎ/ՁԻԱՀ-ի միացյալ ծրագրի փորձագիտական խմբի առաքելության արդյունքում կազմված զեկույցի մեջ:
Գերազանց ինտեգրում և համագործակցություն է ձեռք բերվել մանկաբարձագինեկոլոգիական ծառայությունների հետ, ինչի շնորհիվ ՀՀ-ում վերացվել է մորից երեխային ՄԻԱՎ-ի փոխանցումը: Այս ամենում իր նշանակալի դերակատարումն ունի ՁԻԱՀ-ի կենտրոնը, որը շարունակում է իր ամենօրյա հետևողական աշխատանքը երկրի այս կարևորագույն ձեռքբերումը պահպանելու ուղղությամբ: Սա միջազգային լավագույն փորձի օրինակներից է:
❓ՀԱՐՑ. Ո՞ր միջազգային կառույցն է առաջարկել միացնել ՁԻԱՀ-ի կենտրոնը «Նորք» ինֆեկցիոն կլինիկական հիվանդանոցին՝ որպես ինտեգրում և ի՞նչ հիմնավորումով»: