Pfizer և BioNTech ընկերությունների համատեղ պատվաստանյութը 94% արդյունավետություն ունի կորոնավիրուսի դեմ։ The Guardian պարբերականի հաղորդմամբ՝ սա բացահայտվել է աշխարհում ամենամասշտաբային հետազոտության արդյունքում, որը կատարվել է Իսրայելում։
Մինչ այժմ կորոնավիրուսի դեմ պատվաստանյութերի տվյալների մեծ մասը հիմնված էր վերահսկվող կլինիկական փորձարկումների վրա։ Սակայն Իսրայելում կատարված հետազոտությունը առաջինն է, որ հիմնված է իրական աշխարհից վերցված, տարբեր փոփոխականներով արդյունքների վրա։
Իսրայելում ուսումնասիրել են 1 միլիոն 200 հազար պատվաստվածների տվյալները։ Պարզվել է, որ պատվաստանյութի 2 դեղաչափերն ունեն 94% արդյունավետություն բոլոր տարիքային խմբերի համար։ Իսկ մեկ դեղաչափի արդյունավետությունը կազմել է 57%։
Հետազոտության արդյունքում նաև պարզվել է, որ պատվաստանյութն արդյունավետ է նաև Մեծ Բրիտանիայում հայտնաբերված մուտացիայի դեմ։ Հետազոտողները հայտնել են, որ չեն կարող արդյունավետության հստակ աստիճան նշել, սակայն ուսումնասիրության պահին բրիտանական շտամը Իսրայելում կորոնավիրուսի գերիշխող տարբերակն էր։
