Առողջապահության նախարար Անահիտ Ավանեսյանը հանդիպել է Ֆրանսիայի Լիոն քաղաքի «Մերիո» հիմնադրամի բժիշկ-ուրոլոգ Գեւորգ (Ժորժ) Քեփենեկյանի եւ «Մերիո» հիմնադրամի Մոր եւ մանկան առողջության պահպանման ծրագրի պատասխանատու Քելիլ Այթուի հետ:
Հանդիպման ընթացքում կողմերը հստակեցրել են առողջապահական ներկայիս կարիքները եւ քննարկել Արցախին ցուցաբերվող հումանիտար աջակցության ուղղությունները` հատուկ ուշադրություն դարձնելով Արցախում վերականգնողական ծառայությունների տրամադրման հարցին, ինչպես նաեւ Ստեփանակերտի մոր եւ մանկան առողջության պահպանման կենտրոնի վերականգնմանն ուղղված աշխատանքներին:
«Ներկայումս կարեւորագույն խնդիր է Հայաստան ժամանակավորապես տեղափոխված արցախցիների հայրենիք վերադարձը, որի համար անհրաժեշտ է ապահովել Արցախի առողջապահական համակարգի անխափան աշխատանքը: Իսկ դրա լուծումը կարող է դառնալ վերանորոգված բժշկական կենտրոնների եւ դրանցում սարքավորումների առկայությունը, բուժաշխատողների վերապատրաստման դասընթացների կազմակերպումը», — ասել է Անահիտ Ավանեսյանը:
Նախատեսվում է ուղիղ կապ ստեղծել Հայաստանի, Ֆրանսիայի Լիոն քաղաքի եւ Արցախի հիվանդանոցների միջեւ, որի շրջանակում կանցկացվեն բժիշկների եւ բուժքույրերի վերապատրաստման դասընթացներ, կիրականացվեն փորձի փոխանակման ծրագրեր: