Օրերս ՀՀ ԱԺ առողջապահության և սոցիալական հարցերի մշտական հանձնաժողովի նախագահ Նարեկ Զեյնալյանը իր Facebook-ի էջում գրառում էր կատարել՝ անդրադառնալով «ՁԻԱՀ-ի կանխարգելման հանրապետական կենտրոնի» և «Նորք» ինֆեկցիոն կլինիկական հիվանդանոցի» միավորման առիթով բարձրաձայնվող բողոքներին և մտահոգություններին։
Պատգամավորը գրառման մեջ հատուկ շեշտել էր, որ հանձնաժողովի անունից հարցում-գրություն է ուղարկել առողջապահության նախարարություն՝ մի շարք հարցերի պարզաբանում ստանալու համար։ Գրառումը կարդացեք՝
https://m.facebook.com/story.php?story_fbid=1769077229883597&id=1111036229021037
Նախարար Արսեն Թորոսյանը ոչ միայն շատ արագ նկատել էր այս գրառումը, այլ նաև արձագանքել։
«7-րդ գումարման ԱԺ աշխատանքների ընթացքում գրեթե չի եղել որևէ նախաձեռնություն առողջապահության նախարարության կողմից, որը «չքննադատվի» պատգամավոր Նարեկ Զեյնալյանի կողմից։ Հիմա էլ հերթը հասավ ՄԻԱՎ/ՁԻԱՀ-ի դեմ պայքարի ոլորտում մեր վարած քաղաքականության «քննադատությանը»»,- նկատել էր Արսեն Թորոսյանը։
Նախարարին, կարծես թե, «մտահոգել» էր հատկապես Նարեկ Զեյնալյանի կողմից արված «ՍՊԻԴ-ի կենտրոն» արտահայտությունը։
Միայն ՍՊԻԴ-ի կենտրոն արտահայտությունն իսկ նման «ոլորտային» պաշտոնյայի կողմից արդեն իսկ անընդունելի է,- գրել է նա:
Այս արտահայտության համար Նարեկ Զեյնալյանը քննադատության արժանացավ ոչ միայն նախարարի այլ նաև «Ակադեմիկոս Ս.Ավդալբեկյանի անվան առողջապահության ազգային ինստիտուտ» ՓԲԸ տնօրեն Ալեքսանդր Բազարչյանի կողմից, ով նախարարի գրառման տակ մեկնաբանել է թե՝ չի կարող հավատալ, որ հանրային առողջապահության մասնագետը, բժշկական գիտությունների թեկնածուն, քաղաքական գործիչը կարող է օգտագործել “ՍՊԻԴ” տերմինը։
Հարց է առաջանում՝ իսկ եթե նույն արտահայտությունն արած լինի նախարար Արսեն Թորոսյանը, Ալեքսանդր Բազարչյանը ինչպես կարձագանքի, կհավատա՞։ Պարզվում է՝ ոչ մի կերպ էլ չի արձագանքի, քանի որ հանդիպումներից մեկի ժամանակ Արսեն Թորոսյանը արել է նման արտահայտություն, սակայն դրա մասին Բազարչյանը ոչ մի մտահոգություն չի ներկայացրել։
Կարո՞ղ է նախարարի՝ նման արտահայտություն անելը ներելի է, քանի որ նա բժշկական գիտությունների թեկնածու չէ, ինչպես պատգամավոր Նարեկ Զեյնալյանը, կամ գուցե Արսեն Թորոսյանը նախարար է, նրան կարելի է, իսկ մյուսներին՝ ոչ։
