Կորոնավիրուսային պանդեմիայի երկրորդ տարին կարող է առաջինից ավելի ծանր լինել՝ հաշվի առնելով վիրուսի տարածման դինամիկան։ Այս մասին հայտարարել է արտակարգ իրավիճակների հարցերով ԱՀԿ ծրագրի տնօրեն Մայքլ Ռայանը։
Նրա խոսքով՝ վերջին 2 շաբաթներին կազմակերպությունում ստացվող տեղեկությունները վկայում են այն մասին, որ հիվանդացությունը կրկին հասել է պիկին։ Այսպիսով՝ վերջին շաբաթվա ընթացքում աշխարհում հաստատվել է մոտ 5 մլն նոր դեպք, ավելի քան 85 հազար մահ։
Ռայանն ընդգծել է, որ հյուսիսային կիսագնդում նկատվում է պանդեմիայի «իդեալական փոթորիկ»։ Նման իրավիճակ է ստեղծվել ցրտի պատճառով փակ տարածքներում մարդկանց կուտակումների և վիրուսի նոր շտամների տարածման պատճառով։
Նշենք, որ ԱՀԿ ղեկավարը պանդեմիայի հարցով արտակարգ իրավիճակների կոմիտեի նիստ է հրավիրել, որը կանցկացվի այսօր։
