Լոս Անջելեսի շտապօգնության մեքենաները կդադարեցնեն կենդանի մնալու ցածր հավանականություն ունեցող մարդկանց հիվանդանոցներ տեղափոխելը: Համապատասխան հրամանը տրվել է շրջանի շտապ բժշկական գործակալության կողմից, հայտնում է Los Angeles Times- ը:
Մասնավորապես, խոսքն այն հիվանդների մասին է, որոնք շնչառության, շարժման, զարկերակի կամ զարկերակային ճնշման նշաններ չունեն՝ չնայած բժիշկների՝ հիվանդին տեղում վերակենդանացնելու փորձերին: Շրջանի բժիշկներին խնդրել են նաև թթվածին խնայել և այն տրամադրել միայն այն հիվանդներին, որոնց արյան մեջ թթվածնի հագեցվածությունը 90 տոկոսից ցածր է:
Իշխանությունները նման արմատական քայլի են դիմել հիվանդանոցային մահճակալների, շտապօգնության բրիգադների և բժշկական ռեսուրսների սուր պակասի պատճառով:
Հաղորդվում է, որ առողջապահական համակարգի վրա աննախադեպ ճնշման պատճառով հիվանդները կարող են շտապօգնության մեքենաներում անցկացնել մինչև ութ ժամ, մինչ սպասում են իրենց հոսպիտալացմանը: Միևնույն ժամանակ, հիվանդանոցները փորձում են հնարավորինս շուտ դուրս գրել հիվանդներին՝ շտապօգնության կարիք ունեցողների համար տեղ ստեղծելու նպատակով:
Պաշտոնյաները մտավախություն ունեն, որ իրավիճակը միայն կվատթարանա առաջիկա շաբաթներին՝ Ամանորյա արձակուրդներից հետո COVID-19-ի հիվանդացության աճի պատճառով:
