«Այսօր մի կողմից շարունակվում են նախարարության հետ քննարկումները, թե ինչպես ենք վերազինելու ծննդատները պետական մասնակցությամբ, մյուս կողմից ավելացել են տարբեր տեղերից տեխնիկական աջակցության առաջարկները»,- ասել է Տավուշի մարզպետ Հայկ Չոբանյանը փետրվարի 7-ին ամփոփիչ ասուլիսի ժամանակ՝ անդրադառնալով Աչաջրի և Արծվաբերդի ծննդատների գործունեությանը:
Մարզպետն ընդգծեց, որ այսօր բանակցում են հնարավոր աջակիցների, հովանավորների հետ: Ըստ նրա` մեծ ծավալի ներդրումների կարիք կա այդ ծննդատներում անվտանգ ծննդօգնության համար բավարար պայմաններ ստեղծելու համար:
«Արծվաբերդը շատ փոքր քանակի ծնունդներ է ընդունել, կարծեմ մեկ տասնյակի կարգի, Աչաջրում կարծեմ 77 ծնունդ է եղել: Իջևանը մոտ է Աչաջրին, և բոլոր ռիսկային դեպքերը ուղղորդվում են Իջևան: Փառք Աստծո, որ որևէ վատ ելքով նախադեպ չենք ունեցել, բայց դա չի նշանակում, որ պետք է չապահովենք այդ պայմանները:
Ըստ մասնագետների` կրիտիկական վիճակը կարող է լինել ցանկացած ծննդաբերության ընթացքում: Ես, որպես մարզի ղեկավար և որպես էս ոլորտի պատասխանատու մարզում, եթե անկեղծ լինեմ, իմ հարազատ մարդուն չեմ ուղղորդի այդ առողջության կենտրոն, որտեղ համապատասխան պայմաններ չկան: Եվ ես բարոյական իրավունք չունեմ դա չանելու մնացած մարդկանց դեպքում»,- նշել է Հայկ Չոբանյանը:
Սառա Հարությունյան
