Ջուրը մեր օրգանիզմի առաջնային և կարևորագույն բաղադրիչներից մեկն է և պատահական չէ, որ այն կազմում է հասուն մարդու օրգանիզմի 60-65 տոկոսը։ Ուստի օրգանիզմում ջրի բավարար պակասը կարող է առաջ բերել մի շարք խանգարումներ։
Ջրազրկման մասին խոսք է գնում, երբ օրգանիզմը, կորցնելով իր ջրային միջավայրերը, չի կարողանում ապահովել օրգանիզմում նորմալ նյութափոխանակությունը: Այս վիճակը սովորաբար առաջանում է ոչ թե օրգանիզմ մուտք գործող ջրի քանակի նվազման, այլ օրգանիզմից հեռացող ջրի քանակի ավելացման՝ ջրի կորստի պատճառով:
Օրգանիզմում ջրի դեֆիցիտի առաջացման նախնական նշանների, հետևանքների և կանխարգելման միջոցների մասին MedMedia-ի հետ զրույցում խոսեց էնդոկրինոլոգ Բարինե Բաղրամյանը:
Բժշկի պնդմամբ` ջրազրկման առաջացման հիմնական պատճառն օրգանիզմում ջրի բավարար քանակի պակասն է, որն էլ կարող է մի շարք խնդիրներ առաջացնել:
«Ջրազրման հիմնական պատճառներն են գերքրտնարտադրությունն ու ջրի քիչ օգտագործումը: Նման դեպքերում մեծանում է արյան խտությունը, որի պատճառով ընդհանուր օրգանիզմում տարբեր տեսակի սնուցողական փոփոխություններ են տեղի ունենում: Մեծանում է նաև սրտի ծանրաբեռնվածությունը»,- նշեց բժիշկը:
Բարինե Բաղրամյանի խոսքով` հիվանդների գանգատները կարող են կողմնորոշել օրգանիզմում ջրի դեֆիցիտի մասին, որոնց առկայության դեպքում հնարավոր կլինի անհրաժեշտ միջոցառումներ ձեռնարկել:
«Արտաքինից մենք տեսնում ենք մաշկի չորություն, ներս ընկած ակնակապիճներ, բերանի և լորձաթաղանթի չորություն: Դեպքերի մեծ մասում հիվանդն անընդհատ ջուր խմելու ցանկություն է ունենում:
Եվ սա հաշվի առնելով ցանկացած դեպքում խորհուրդ է տրվում բավականաչափ ջուր խմել`օրական առնվազն 1,5 լիտր, իսկ եթե օրգանիզմում ավելի շատ է ջրի կորուստը, որն ուղեկցվում է փսխումներով կամ փորլուծությամբ, անհրաժեշտ է ավելացնել ջրի կամ հեղուկների օրական քանակը»,- ասաց նա:
Բժիշկն հատկապես կարևորում է երեխաների շրջանում ջրազրկման խնդիրը, որը ենթադրում է առավել մեծ ուշադրություն:
«Երեխաների մոտ դիտվող ջրազրկումը կարող է հանգեցնել մի շարք լուրջ խնդիրների: Փորլուծությամբ պայմանավորված ջրազրկման դեպքում խիստ անհրաժեշտ է դիմել բժշկի, քանի որ երեխան կարող է անգամ կոմայի մեջ ընկնել»,- եզրափակեց Բարինե Բաղրամյանը:
Աննա Գալուստյան