Աշխարհում կորոնավիրուսով վարակման դեպքերի աճն անցած շաբաթ կազմել է ավելի քան 4․3 միլիոն, ինչն ամենաբարձր ցուցանիշն է պանդեմիայի սկսվելուց ի վեր։ Այս մասին հայտնում է Առողջապահության համաշխարհային կազմակերպությունը։
Մահվան դեպքերի ընդհանուր թիվն աճել է ավելի քան 70 հազարով։ Աշխարհում 7 օրում հիվանդացության նախորդ ռեկորդը գրանցվել էր նոյեմբերի 16-22-ը՝ ավելի քան 4 մլն դեպք։
Կազմակերպության տվյալներով՝ վարակման նոր դեպքերի մեծ մասն անցած շաբաթ բաժին է ընկել Եվրպային, որտեղ գրանցվել է ավելի քան 1․6 մլն նոր դեպք, 34 հազար մահ, և Հյուսիսային ու Հարավային Ամերիկաներին, որտեղ գրանցվել է վարակման ավելի քան 2 մլն դեպք, մահացել է ավելի քան 29 հազար մարդ։
ԱՄՆ-ում մեկ շաբաթում վարակակիրների թիվն ավելացել է 1․4 միլիոնով։ Այնուհետև գալիս են Բրազիլիան (ավելի քան 302 հազար նոր դեպք), Թուրքիան (219 հազար), Հնդկաստանը (212 հազար), Ռուսաստանը (193 հազար), Գերմանիան (149 հազար)։