«Որոշ մարդիկ պետության անունից մտնում են կլինիկաներ և ասում են, որ ձեր 5-ը տարին լրացել է, դուք պետք է վերապատրաստում անցնենք: Բայց մի անհանգստացեք. կարող եք 175 հազար դրամ վճարել և միայն թուղթը վերցնելուց գալ»,- այս մասին ասել է վիրաբույժ-ստոմատոլոգ Հովհաննես Գևորգյանը իր ֆեյսբուքյան ուղիղ եթերում:
Նա խոսել է ստոմատոլոգիական ոլորտում բարեփոխումների, ինչպես նաև կրթության և հետբուհական վերապատրաստումների որակի մասին` նշելով, որ պետք է վերանայել և խելամտորեն սահմանել այդ հարցերի ֆինանսական չափը:
Հովհաննես Գևորգյանն ընգծեց, որ ստամատոլոգիական ոլորտում հարկային բարեփոխումներ են կատարվել, սակայն միայն այդ բարեփոխումներով չի պայմանավորված երկրի տնտեսական զարգացումը և արմատական բարեփոխումները:
«Շատ խնդիրներ կան այսօր առողջապահական ոլորտում, որոնց համար բազմիցս դիմել ենք Առողջապահության նախարարություն: Սակայն ի՞նչ է ստացվում: Դե յուրե մենք ունենք նամակագրություն, որի վրա մենք երկար ժամանակ ենք ծախսել, դե ֆակտո` չկա կառուցողական մոտեցում և պրոդուկտիվ արդյունք»,- ասել է վիրաբույժ-ստոմատոլոգը:
Նրա խոսքով` արդեն հույս չկա, որ կկարողանան Առողջապահության նախարարության հետ համագործակցել և լուծել հարցերը:
Սառա Հարությունյան
