Իմամ Խոմեյնիի գործադիր շտաբի ղեկավար Մոհամմադ Մոխբերը հայտարարել է, որ Իրանում երկու շաբաթից կմեկնարկի կորոնավիրուսի դեմ տեղական պատվաստանյութի փորձարկումը մարդկանց վրա:
Ինչպես փոխանցում է «Մեհր» գործակալությունը, պաշտոնյան նշել է, որ ինքն ու իր գործընկերները պատրաստ են մասնակցելու փորձարկմանը: «Անհրաժեշտ միջոցառումներ են ձեռնարկվել կորոնավիրուսի դեմ պատվաստանյութի արտադրության հետ կապված, և մենք կստեղծենք լավագույն ու ամենաանվտանգ պատվաստանյութը երկրում»,- ասել է իրանցի պաշտոնյան:
Նրա խոսքով՝ մարդկանց վրա փորձարկումը կանցկացվի երեք փուլուվ: «Փորձարկումից 3-4 ամիս անց Իրանն այլևս պատվաստանյութ ներկրելու կարիք չի ունենա»,- հավելել է Մոխբերը:
Նշվում է, որ ևս երեք իրանական պատվաստանյութեր գտնվում են արտոնագիր ստանալու փուլում: Իսկ փորձարկման ենթակա պատվաստանյութն արդեն արժանացել է երկրի առողջապահության նախարարության հավանությանը:
Վերջին տվյալների համաձայն՝ Իրանում կորոնավիրուսով վարակվածների թիվը գերազանցել է 1,1 մլն-ը, իսկ մահացածներինը՝ 51 000-ը:
Աղբյուրը՝ Tert.am