Ռուսաստանի դաշնությունում ստորագրվել է երկրի տարածք վարակի ներմուծումն ու դրա տարածումը կանխելուն ուղղված ազգային ծրագիր: Այս մասին հայտարարել է ՌԴ վարչապետ Միխայիլ Միշուստինը: Կորոնավիրուսն ավելացվել է խիստ վտանգավոր հիվանդությունների ցանկում: Վարչապետը նաև տեղեկացրել է, որ Ռուսաստանն ունի բոլոր անհրաժեշտ դեղամիջոցներն ու պաշտպանական միջոցները:
Օտարերկրացիները, որոնց մոտ նոր կորոնավիրուս է հայտնաբերվել, կարող են արտաքսվել Ռուսաստանից, տեղեկացնում է «Ինտերֆաքս»-ը՝ վկայակոչելով վարչապետ Միխայիլ Միշուստինին:
«Կարող է իրականացվել օտարերկրյա քաղաքացիների արտաքսում, եթե նրանք ունեն նման հիվանդություն, հատուկ սահմանափակող միջոցների կիրառություն, ներառյալ մեկուսացումը և կարանտինը»,- պարզաբանել է Միշուստինը:
Նա հիշեցրել է, որ Չինաստանի քաղաքացիների շարժը երկրի սահմանի երկայնքով արդեն սահմանափակ է: Հիվանդները մեկուսացված են և ստանում են անհրաժեշտ օգնություն:
Բացի դրանից՝ վարչապետը նշել է, որ ժամանակավորապես արգելք է սահմանվել Չինաստանի քաղաքացիներին զբոսաշրջային և աշխատանքային վիզաների տրամադրման վրա: Միշուստինը նաև հայտնել է վարակի դեմ պայքարելու համար Չինաստան մարդասիրական օգնություն ուղարկելու որոշման մասին:
«Ռուսաստանն այժմ ունի բոլոր անհրաժեշտ դեղամիջոցներն ու բուժումները: Կարևոր է, որ մարդիկ լիովին ապահովված լինեն դրանցով և, իհարկե, որ դեղատներում գները մնան նույն մակարդակի վրա»,- ընդգծել է Միշուստինը:
