Ակնեն մաշկի քրոնիկ հիվանդություն է՝ բորբոքային ախտահարման տեսքով, որն առաջանում է ճարպագեղձերի խցանման և թարախային բորբոքման հետևանքով: Բազմաթիվ դեռահասների դեմքին կամ մարմնի այլ մասերին ակնեի հայտնվելը շատերի համար սովորական է դարձել: Սակայն, ինչպես դեռահասները, այնպես էլ մեծահասակները երբեմն բախվում են մաշկային այս հիվանդությանը:
Ի՞նչ է ակնեն, ինչու՞ է առաջանում և ինչպե՞ս բուժել այն: Այս հարցերի պատասխանը տալիս է «Աջափնյակ» ԲԿ-ի մաշկաբան-կոսմետոլոգ Լուսինե Բարսեղյանը:
Որո՞նք են ակնեի առաջացման գլխավոր պատճառները
Ակնեն հանդիպում է բոլոր տարիքային խմբերի մոտ՝ մանկական, պատանեկան և մեծահասակների: Կարելի եզրակացնել, որ ամեն տարիքային խմբիմոտ գոյություն ունի ակնեի առաջացման սպեցիֆիկ պատճառներ: Պետք է նշեմ, որ բոլոր դեպքերում էլ հիվանդությունն ուղեկցվում է մաշկի գերճարպարտադրությամբ և մաշկի վրա առաջացած սև կետիկների, կարմիր թարախաբշտերի, սպիերի և հետքերի տեսքով: Առանձնացնեմ մի քանի գործոններ, որոնք նպաստում են ակնեի առաջացմանը:
- Հորմոնալ խանգարումներ
- Սխալ սննդակարգ
- Ավիտամինոզ
- Հիգիենայի կանոնների խախտում
- Դեկորատիվ կոսմետիկայի չարաշահում
- Ինֆեկցիաներ, ներքին օրգան-համակարգերի ախտահարումներ
- Ժառանգական ֆակտորներ
- Ցածր իմունիտետ
- Սթրեսներ
Արդյո՞ք ակնեի առկայությունը կարող է պայմանավորված լինել ժառանգական գործոնով
Վերջին հետազոտությունները ցույց են տալիս, որ ժառանգական նախատրամադրվածությունը մեծ դեր է խաղում ակնեի առաջացման գործում: Ժառանգական նախատրամադրվածությունը ակնեի առաջացման գործում պետք է բաժանել երկու խմբի՝ նախատրամադրվածություն մաշկի գենային համակարգի և սեռական հորմոնների գեների:
Ակնեի դեպքում հնարավո՞ր է սպիերի առաջացում
Այո՛, հնարավոր է: Սպիերը առաջանում են առավել խորը տեղակայված թարախաբշտերի դեպքում: Երբեմն ոչ փորձառու մասնագետի կամ հենց պացիենտի կողմից հեռացված էլեմենտները հանգեցնում են են պրոցեսի տարածման, մաշկի տրավմատիզացիայի և հետագայում սպիերի առաջացման:
Ակնեով հնարավո՞ր է վարակվել կամ վարակել
Ակնեն վարակիչ հիվանդություն չէ: Դա միֆ է: Սակայն կան թարախաբշտային հիվանդություններ, որոնք շրջապատի կողմից ընկալվում են որպես ակնե (պզուկներ): Դրանցից հնարավոր է վարակվել, քանի որ հարուցիչները (բակտերիաներ, կոկեր) արդեն իսկ ախտածին ենհամարվում:
Ակնեի առաջացումը որքանով է կապված սննդակարգի հետ
Դեռ շատ վաղուց է հայտնի է, որ մաշկի որակը կախված է սննդակարգից և ուտելիքի որակից: Եթե սննդակարգը հագեցած է ածխաջրերով, ապա ճարպագեղձերը սկսում են շատ ճարպ արտադրել, որն է ակնեյի առաջացման նախապայման է: Եվ ընդհանրապես աղեստամոսքային տրակտիհիվանդությունների դեպքում (գաստրիտ, ճիճվակրություն) ակնեն հաճախակի է հանդիպում:
Ի՞նչ միջոցներ պետք է ձեռնարկել ակնեից ազտվելու համար
Եթե ակնեն առկա է մոտ երկու ամիս և ավել, ապա առաջնահերթ է դիմել մաշկաբանի: Ակնեից խուսափելու համար հարկավոր է ճիշտ սննդակարգի հետևել, կարելի է անգամ տնային պայմաններում խնամել մաշկը՝ ըստ նրա տեսակի: Ինչպես նաև պետք է չչարաշահել սպիրտ պարունակող լուծույթներ: Մաշկի տնային խնամքում ներառել լվացվելու միջոցներ (առավոտ, երեկո), խոնավեցնող քսուքներ, որոնք չեն պարունակում լրացուցիչ ճարպեր: Շաբաթը մեկ անգամ կարելի է օգտագործել սպիտակ կավից դիմակներ տարբեր հավելումներով (ցինկ, բուսական մզվածքներ): Պետք է նաև ամիսը մեկ անգամ այցելել կոսմետոլոգի, կատարել պիլինգներ, դեմքի մաքրում և այլ պրոցեդուրաներ, որոնց շնորհիվ կունենաք փայլուն և առողջ մաշկ՝ առանց սպիերի և հետքերի:
Սառա Հարությունյան