Գլխամաշկի թեփը մաշկի շերտազատված և մեռուկացած մասնիկներն են, որի առաջացման հիմնական պատճառը սեբորեա կոչվող մաշկաբորբն է:
Այն արտահայտվում է եղջերացած բջիջների՝ մանր թեփուկների տեսքով՝ ներծծված ճարպագեղձերի կողմից արտադրվող ճարպով։ Մաշկաբան Լուսինե Բարսեղյանը նշում է, որ թեփի առաջացման հիմնական գործոններից են ճարպագեղձերի ոչ ճիշտ աշխատանքը (գերճարպարտադրությունը), և գրեթե բոլորիս մոտ ինակտիվ վիճակում գտնվող Malassezia furfur տեսակի սնկերը։ Սնվելով ճարպագեղձերի կողմից արտադրվող ճարպով, սնկերը սկսում են ինտենսիվ բազմանալ և ի վերջո բերում են գլխամաշկի մակերեսային շերտի անկանոն շերտավորման՝ թեփի առաջացման։
Գլխամաշկի թեփի առաջացման պատճառներ
- Սեբորեա
- Հորմոնալ խանգարումներ
- Խրոնիկ հիվանդություններ
- Սթրես
- Անկանոն սնվել (մարսողության խանգարումներ)
- Ցածր դիմադրողականություն
- Մազերի ոչ ճիշտ խնամք
- Ժառանգականություն
Բուժման մեթոդներ
Գլխամաշկի բուժման մի քանի մեթոդներ կան՝ դեղորայքային, ֆիզիոթերապևտիկ և կոսմետոլոգիական արդի մեթոդներ։ Թեփի բուժումը, որպես կանոն, տևում է 1-2 ամիս: Բուժման արդյունավետությունը կախված է ոչ միայն մեթոդի ընտրությունից, այլ նաև պատճառի հայտնաբերման և վերացման գործընթացից։
Որպեսզի կարողանաք թեփից ազատվել, կարևոր է ուշադրություն դարձնել սննդակարգին: Սեբորեայի դեպքում խորհուրդ է տրվում սահմանափակել քաղցրի, կծվի և ճարպոտ սննդի քանակությունը: Ձեր սննդակարգը անպայման պետք է հարուստ լինի А, В, С, Е վիտամիններով և բջջանյութերով: Բացի այդ թեփը բուժելու համար կիրառում են.
- հեղուկ ազոտով կրիոմերսում
- ֆիզիոթերապիա
- ուլտրամանուշակագույն ճառագայթներով ներգործություն:
Ի՞նչ չի կարելի անել թեփի դեպքում
- Մաշկի խնամքի սպիրտ պարունակող միջոցներ
- Քերել գլխի մաշկը սանրով կամ այլ միջոցներով
- Ներկել մազերը հիվանդության սրացման ժամանակ
- Մինչ ախտանշանների վերանալը խորհուրդ չի տրվում օգտագործել ֆեն