Հայաստանի մանկական քաղցկեղի եւ արյան հիվանդությունների կենտրոնի ղեկավար Գեւորգ Թամամյանի ազատման դիմումը դեռեւս չի ստորագրվել: Պրոֆեսոր Ռ. Հ. Յոլյանի անվան Արյունաբանական կենտրոնի տնօրեն Սամվել Դանիելյանը ՀԺ-ին ասաց՝ հարցի շուրջ պետք է մտածի:
Ավելի վաղ հայտնել էինք, որ Գեւորգ Թամամյանն ազատման դիմում է ներկայացրել կենտրոնի ղեկավարի պաշտոնից, ինչպես նաեւ Արյունաբանական կենտրոնում մանկական ուռուցքաբան-արյունաբանի աշխատանքից: Նրա խոսքով՝ որոշման պատճառն այն է, որ ՀՀ առողջապահության նախարարությունը որոշել է սույն թվականի հոկտեմբերի 1-ից լուծարել Արյունաբանական կենտրոնի տնօրեն Սամվել Դանիելյանի հետ կնքված աշխատանքային պայմանագիրը:
Մեզ հետ զրույցում Դանիելյանը, պատասխանելով հարցին՝ արդյոք պատրաստվո՞ւմ է ստորագրել Գեւորգ Թամամյանի ազատման դիմումը, նշեց, որ դա լուրջ գործընթաց է, քանի որ, իր կարծիքով, Թամամյանը երկրի կարեւոր կադրերից է, եթե ոչ ամենալավը: «Ես խորհրդակցության կարիք կունենամ, Թամամյանը մեր ժողովրդի լավագույն զավակներից մեկն է»,- նշեց նա:
Անդրադառնալով իր հետ կնքված պայմանագիրը լուծարելու մասին նախարարության որոշմանը՝ Դանիելյանը նշեց, որ աշխատանքային հարաբերություններ են, իր պայմանագրի ժամկետը լրացել է, եւ նախարարի իրավունքն է այն չերկարացնելը:
«Օրինական գործընթաց է, որին, բնական է, նորմալ եմ վերաբերում»,- նշեց նա՝ հավելելով, որ չգիտի՝ թափուր պաշտոնի համալրման համար հայտարարվելիք մրցույթին նորից կարո՞ղ է մասնակցել, թե՞ ոչ: Ասաց՝ չի հետաքրքրվել, երբ օրը գա, կմտածի, ողջամիտ որոշում կկայացնի եւ կլուծի իր առջեւ դրված խնդիրները:
Առողջապահության նախարարության լրատվական բաժնից մեզ տեղեկացրին, որ լրանում է Սամվել Դանիելյանի աշխատանքային պայմանագրի ժամկետը, մրցույթի արդյունքում Դանիելյանի հետ կնքվել էր աշխատանքային պայմանագիր մինչեւ 2020թ. հոկտեմբերի 1-ը՝ վերջինիս 65 տարեկանը լրանալը:
Դանիելյանը Արյունաբանական կենտրոնի տնօրենի թափուր պաշտոնի մրցույթին մասնակցել եւ այդ պաշտոնում նշանակվել է 2019-ի հունվարին: Մինչ այդ՝ 2018թ. հունիսի 21-ից, նա եղել է տնօրենի պաշտոնակատար:
Ինչպես հավելեցին ԱՆ-ից, կենտրոնի տնօրենի մրցույթին, օրենսդրությամբ սահմանված կարգով, կարող է մասնակցել 65 տարեկանը չլրացած անձը: Պաշտոնը թափուր մնալուց հետո, ըստ ընթացակարգի, պետք է հայտարարվի նոր մրցույթ:
