Անգամ փորձառու ծնողները նորածնին խնամելիս դժվարություններ են ունենում: Բազմաթիվ «ինչունե՞ր», «ինչե՞ր», «երբե՞ր» ու «կարողաներ» են պտտվում այս ընթացքում:
Ի օգնություն ծնողների MedMedia.am-ը նորածինների ֆիզիոլոգիական դեղնուկի մասին զրուցել է Շենգավիթ ԲԿ-ի Նորածնային վերակենդանացման բաժնի ավագ մասնագետ Արթուր Ջանազյանի հետ: «Առողջ նորածնի կյանքի 2-3-րդ օրվանից սկսած ի հայտ է գալիս մաշկի և տեսանելի լորձաթաղանթների դեղնություն»,-ընդգծեց մասնագետը և շարունակեց. «Դա, այսպես կոչված, նորածինների ֆիզիոլոգիական դեղնուկն է։ Այն պայմանավորված է արյան մեջ բիլիռուբինի բարձր մակարդակով»:
Արթուր Ջանազյանը նաև առանձնացրեց ֆիզիոլոգիական դեղնուկին բնորոշ չորս փաստեր.
- Ֆիզիոլոգիական դեղնուկը չի պահանջում որևէ բուժական միջամտություն
- Ֆիզիոլոգիական դեղնուկը սովորաբար տևում է 10 օր
- Անհաս նորածինների մոտ դեղնուկը կարող է տևել մինչև 2 շաբաթ
- Երեխայի ընդհանուր վիճակը, ակտիվությունը կամ ինքնազգացողությունը որևէ կերպ չեն տուժում
Բժշկի խոսքով՝ անհրաժեշտ է լրացուցիչ հետազոտել, եթե դեղնուկը՝
- Ուղեկցվում է երեխայի ընդհանուր վիճակի, ակտիվության փոփոխությամբ
- Ի հայտ է եկել կյանքի 7-րդ օրվանից հետո
- Պահպանվում է ավելի երկար
- Ուղեկցվում է մուգ մեզով և անգույն կղանքով
- Ունի հարաճուն/ուժգնացող ընթացք:
