Անձնական մեքենաներում դիմակ չկրելու համար քաղաքացիներին շարունակում են տուգանել։ Այս մասին MedMedia-ի հետ զրույցում ասաց «Իրավական ուղի» ՀԿ համահիմնադիր Ռուբեն Մելիքյանը՝ հայտնելով, որ իրենց դիմել է Գեղարքունիքի մարզի մի բնակիչ։
«Ստացանք ահազանգ և հասկացանք, որ կառավարությունը, փաստորեն, շարունակում է կիրառել այդ կանոնը, թեև երեկ, ըստ էության, եղավ այն կոմունիկացիան, որ այդ պահանջը վերացվում է։ Ճիշտ է, ԱԺ ամբողջ նիստը դիտելու դեպքում պարզ էր, որ փոփոխությունը տեղի է ունենալու ուրբաթ օրվանից»,-ասաց նա։
Մելիքյանի խոսքով՝ պարզ է, բոլոր քաղաքացիները չէ, որ ԱԺ նիստերը դիտում են ամբողջությամբ, ինչի արդյունքում էլ եղել է թյուրիմացություն։
«Երեկ ամբողջ տեղեկատվական դաշտը փոխանցեց լուրը, որ այսուհետ անձնական ավտոմեքենաներում դիմակ կրելը պարտադիր չէ։ Մարդիկ սխալ ուղերձ ստացան և շատ շատերը անկեղծորեն և բարեխղճորեն վստահ են, որ այս պահանջը վերացվել է։Այսօր մարդկանց տուգանում են՝ ֆորմալ առումով ճիշտ լինելով, բայց ոչ ֆորմալ առումով՝ իհարկե սխալ լինելով, որովհոտև այդ ուղերձը քաղաքացիները երեկ ստացան»,-նշեց նա։
Մելիքյանի խոսքով՝ որևէ քաղաքացի պարտավոր չէ ԱԺ նիստն ամբողջությամբ լսել․«Զգուշացնում ենք քաղաքացիներին այն մասին, որ անձնական մեքենաներում դիմակ կրելը դեռ ուժի մեջ է»։
Լուսինե Մարդոյան
