Գյումրիում նոր ծննդատուն է կառուցվում: Այս մասին MedMedia-ի հետ զրույցում ասաց Գյումրիի մոր և մանկան ավստրիական հիվանդանոցի տնօրեն Ժորժիկ Սերոբյանը։
«Շինարարական աշխատանքները մեկնարկել են մայիսից, նախատեսում ենք մոր և մանկան ավստրիական հիվանդանոցի ծննդատան նոր մասնաշենք կառուցել։ Այն լինելու է եռահարկ։ Նոր մասնաճյուղում տեղակայվելու են՝ կանանց կոնսուլտացիան, մանկաբարձական ծառայությունը, գինեկոլոգիական ծառայությունը»,-նշեց նա։
Սերոբյանը հայտնեց, որ շինարարությունը նախատեսված է ավարտել հաջորդ տարի։ Շինարարական աշխատանքներն ամբողջությամբ ֆինանսավորում է շվեյցարահայ գործարար Վարդան Սրմաքեշը։
Հարցին, թե ինչպե՞ս, ի՞նչ միջոցներով են զինելու նոր մասնաշենքը, նա պատասխանեց․«Գյումրիի մոր և մանկան ավստրիական հիվանդանոցում ունենք մանկաբարձա-գինեկոլոգիական բաժանմունք, որտեղ տեխնիկական հագեցվածությունը շատ բարձր է։ Թե հավելյալ ինչ սարքավորումներ կգնենք կամ ինչպես, այս պահին ասել չեմ կարող»։
Լուսինե Մարդոյան
