Ախտորոշման բնագավառում կարևորոգույն դերակատարությունն ունեցող ՄՌՏ և ՀՇ հետազոտություններ իրականացնող կենտրոնների համար Հայաստանում ինչպես և ամբողջ աշխարհում, սահմանված են հստակ չափորոշիչներ, որոնք մանրամասնում են թե տեխնիկական հագեցվածությունը, թե շենքային պայմանները և թե աշխատակազմի հագեցվածությունը, դա է կառավարության 2002թ․ 1936-Ն որոշումը։ Կառավարության տվյալ որոշմանը համապատասխանելու դեպքում լիցենզավորման համապատասխան մարմինը՝ տրամադրում է գործունեություն ծավալելու իրավունք։ «Միբս» ախտորոշիչ կենտրոնը համապատասխանելով կառավարության տվյալ որոշման նորմերին, ձեռք է բերել հետազոտություն անցկացնելու լիցենզիա, սակայն իրականացրել է նաև անզգայացման ծառայություն, որը համաձայն ՀՀ լիցենզավորման օրենքի և կառավարության 2008թ․-ի 276 որոշման պահանջում է առանձին լիցենզավորում։ Մինչ դեռ «Կենսաբանական Համակարգերի Միջազգային Ինստիտուտի Բժշկա-Ախտորոշիչ Կենտրոն, Երևան» ՍՊԸ-ն, որը 2017 թ․-ին վերաձևակերպվել է որպես «Միբս» ՍՊԸ երբեք չի ունեցել անզգայացման ծառայություններ մատուցելու լիցենզիա, հետևապես նաև ընդհանուր անզգայացման համար նախատեսված պայմաններ, սակայն մատուցել է տվյալ ծառայությունը՝ օգտվելով այլ բժշկական կենտրոնի անզգայացման և վերակենդանացման բաժանմունքի ծառայություններից։
Ռուսական ընկերության Ս․Մ․Բերեզինի անվան հայաստանյան մասնաճյուղը՝ նույն ինքը «Միբս» ախտորոշիչ կենտրոնը, իրականացրել է նաև երեխաների ախտորոշիչ հետազոտություն անզգայացման միջոցով, որի լիցենզիան չի ունեցել նույնիսկ «Երևան» ԲԿ-ն, որի անզգայացման և վերակենդանցման ծառայություններից է օգտվել «Միբս» կենտրոնը։
Այսպես, 2013թ․-ի մայսի 29-ին Երևանի Մարի Իզմիրլյանի անվան մանկատնից Ս․Բ․ Բերեզինի անվան հայաստանյան ախտորոշիչ կենտրոն՝ նույնի ինքը «Միբս» ԲԿ-ում մագնիսառեզոնանսային տոմոգրաֆիկ հետազոտություն (ՄՌՏ) են անցել 6 նյարդահոգեբանական խնդիրներ ունեցող երեխաներ։ Հետազոտված բոլոր երեխաների մոտ առաջացել է ինքնազգացողության վատթարացում, 3-ը շտապօգնությամբ տեղափոխել են «Արաբկիր» ԲԿ՝ դեղորայքային ալերգիայով, իսկ մեկի մոտ արձանագրվել է հիպովոլեմիկ շոկ։
Կատարվածի համար իրավական կամ վարչական պատասխանատվության չի ենթարկվել ոչ ոք, մինչդեռ այն նախատեսված է ՀՀ լիցենզավորման մասին օրենքի 3-րդ հոդվածով։
Հիշեցնենք նաև, որ հայաստանյան «Միբս» ընկերության տնօրեն այդ տարիներին եղել է ՀՀ առողջապահության ներկայիս նախարար Արսեն Թորոսյանը, իսկ այժմ կենտրոնը ղեկավարում է նրա կինը՝ Վարդանուշ Թևանյանը։