Վերջին մի քանի օրերի ընթացքում ԱՄՆ-ում կորոնավիրուսից մահվան դեպքերը զգալիորեն աճել են:
CNN-ի փոխանցմամբ՝ երկրում մահվան առաջին դեպքն արձանագրվել է փետրվարի 29-ին: Դրանից 54 օր անց այդ թիվը հասավ 50 հազարի, ևս 34 օր անց՝ մայիսի 27-ին 100 հազարի, իսկ հուլիսի 30-ին՝ արդեն 150 հազարի:
Երկրի 29 նահանգներում օրական մահերի թիվն առնվազն 10 %-ով ավելի բարձր է եղել անցյալ շաբաթվա համեմատությամբ:
Բժշկական ոլորտի մասնագետները նախազգուշացրել են, որ այս թիվը կարող է կտրուկ աճել, եթե Միացյալ Նահանգները չկարողանա համավարակը վերահսկողության տակ առնել:
Վարակաբաններն ասում են, որ երկիրը բեկումնային կետում է գտնվում: Միևնույն ժամանակ քննարկումներ են ընթանում՝ ինչպես բացել դպրոցները կամ արդյոք արժե՞ դրանք բացել, թե՞ ոչ:
ԱՄՆ գլխավոր վարակաբան Էնթոնի Ֆաուչին ասել է, որ ԱՄՆ-ում դեպքերի թիվը սկսել է աճել գարնան վերջին, երբ բիզնեսները բացվել են, սոցիալական հեռավորության կանոնների պահպանումը՝ մեղմացվել:
