Կորոնավիրուսի համավարակի երկրորդ ալիք հնարավոր է և չլինի։ ՏԱՍՍ-ի հաղորդմամբ, նախօրեին ճեպազրույցում ասել է Առողջապահության համաշխարհային կազմակերպության արտակարգ իրավիճակների ծրագրերի ղեկավար Մայքլ Ռայանը:
«Վստահություն նրանում, որ կգա երկրորդ ալիքը, չկա»,- ասել է նա:
Մայքլ Ռայանը «սպեկուլյատիվ» է անվանել համավարակի երկրորդ ալիքի վերաբերյալ կանխատեսումները:
«Այս հիվանդության հենց սկզբից շատ էին սպեկուլյացիաներն այն մասին, թե ինչ կլինի, երբ փոխվի սեզոնը: Միշտ դժվար է կանխատեսել, թե ինչ կլինի նոր վարակի հետ»,- ասել է ԱՀԿ ներկայացուցիչը։
Նրա խոսքով, նոր ալիք լինելու մասին խոսակցությունները հիմնված են այն հասկացության վրա, որ այն շնչառական վիրուս է, և նման վիրուսները «հակված են ունենալ սեզոնային բնույթ»:
Փորձագետն ասել է, որ շատ երկրներում վարակման դեպքերի ներկայիս աճը չպետք է դիտարկել որպես երկրորդ ալիք, այլ որպես համաճարակի «երկրորդ պիկ»։ Դրա հետ կապված Ռայանը կոչ է արել վիրուսի դեմ պայքարել ողջ ուժերով հիմա, ինչպես նաև դասեր քաղել առաջին ալիքից։