Նախաճաշն օգնում է մեզ արթնանալ, բարձրացնում է տրամադրությունը, իսկ շատերի համար այն կարող է լինել օրվա ընթացքում միակ ժամանակը, երբ կարելի է մեկուսանալ: Այն պարտադիր է առողջ լինելու համար, քանի որ ապահովում է օրվա ողջ էներգիան:
Ինչպես սննդաբան-էնդոկրինոլոգ Հասմիկ Աբովյանն է նշում՝ նախաճաշը չափազանց կարևոր է ոչ միայն ավել քաշի դեմ պայքարելու համար, այլ նաև օրգանիզմի ընդհանուր առողջության, մասնավորապես սիրտ-անոթային, աղե-ստամոքսային համակարգերի և այլնի:
Առողջ և կանոնավոր նախաճաշը ունի բազմաթիվ դրական կողմեր
- ախորժակի կսրգավորում
- քաշի նվազեցում և
- նյութափոխանակության կարգավորում
Սննդաբանի խոսքով, որքան էլ զբաղված լինի մարդը, սեփական առողջության համար պետք է կարողանա գոնե մի քանի րոպե գտնել և նախաճաշել, քանի որ նախաճաշ չանելը կարող է հանգեցնել մի շարք բացասական հետևանքների:
Չնախաճաշելը բացասական է անդրադառնում աղեստամոքսային համակարգի օրգանների վրա, նպաստում է լեղու թանձրեցման և կանգի, լեղաքարային հիվանդության զարգացմանը, ընդհանուր նյութափոխանակության նվազեցմանը, ախորժակի բարձրացմանը և որպես հետևանք, քաշի ավելացմանը:
Բացի այդ հետազոտության ընթացքում, որը տևել է 25 տարի, բացահայտվել է, որ չնախաճաշող մարդկանց մոտ ինսուլտի ռիսկը կտրուկ բարձր է, նախաճաշողներից:
