Ամառն իր լիիրավ գործառույթների մեջ է և մինչ շատերը ոգևորված են իրենց գեղեցիկ, գունավոր հագուստներով ու ջերմ եղանաը վայելելով մասնագետը հորդորում են ուշադիր լինել սեփական առողջության հանդեպ: MedMedia.am-ը ամռանը սրտանոթային հավանական բարդությունների ու դրանցից խուսափելու մասին զրուցել է սրտաբան Մարինա Օրդյանի հետ:
«Ամռան հենց առաջին իսկ օրերից սրտի հիվանդություն ունեցողները պետք է դիմեն բժշկի խորհրդատվության և ձեռք բերեն բոլոր անհրաժեշտ դեղերը»,-ասաց սրտաբանը:
Վերջինիս խոսքով շոգին օրգանիզմը շատ հեղուկ է կորցնում, ինչի արդյունքում արյունը սկսում է խտանալ:
«Խիտ արյունը կարող է մի շարք խնդիրների հանգեցնել, այդ պատճառով ցանկալի է ավելի շատ ջուր խմել»,-ասաց սրտաբանը շեշտելով, որ շատ ջուր խմել կարելի է միայն առողջ մարդկանց, որոշ հիվանդությունների դեպքում դա հակացուցված է, այդ պատճառով սեփական «ջրային սննդակարգի» փոփոխումից առաջ ցանկալի խորհրդակցել մասնագետի հետ:
Այս շրջանում Մարինա Օրդյանը հորդորում է խուսափել ճարպոտ մթերքներից. դրանք սրտի համար լրացուցիչ ծանրաբեռնվածություն են ստեղծում: «Փոխարենը ավելի լավ է նախապատվությունը տալ բանջարեղենին և մրգերին, որոնք օրգանիզմի համար օգտակար շատ վիտամիններ ու հանքանյութեր են պարունակում»,-ասաց բժշկուհին և ընդգծեց, որ տարվա այս ժամանակաշրջանում սրտին օգնելու համար, պետք խուսափել ցերեկվա ժամը 12:00-17:00-ն ընկած ժամանակահատվածում արևի տակ գտնվելուց:
«Չպետք է մոռանալ թեթև, հարմար հագուստի և գլխի աքսեսուարի մասին: Հարկավոր է ավելի շատ հանգստանալ, սակայն շարունակել չափավոր ֆիզիկական վարժություններ կատարել և ամենօրյա երեկոյան զբոսանքներ կազմակերպել»,-եզրափակեց զրուցակից:
Տաթև Առաքելյան
