Շենգավիթ ԲԿ-ի բժիշկները փրկել են 28–ամյա երիտասարդի կյանքը․ վնասված է եղել սիրտը, լյարդը՝ ներքին արյունահոսությամբ, տեղեկանում ենք բժշկական կենտրոնի Facebook-ի էջից:
Երեկ՝ հոկտեմբերի 27-ին ժամը 11:15-ի սահմաններում “Շենգավիթ” բժշկական կենտրոն է տեղափոխվել 28 ամյա երիտասարդ լյարդի, սրտի թափանցող կտրած-ծակած վերքով:
Ինչպես տեղեկացնում է “Շենգավիթ” ԲԿ-ի փոխտնօրեն, “Ընդանուր և լապարասկոպիկ” ծառայության ղեկավար Սևակ Շահբազյանը երիտասարդը ընդունվել է լյարդի, սրտի թափանցող կտրած-ծակած վերքով՝ թորակոաբդոմինալ վիրավորումով` անգիտակից, շոկային, ծանր վիճակում: Անհետաձգելի կատարվել է որովայնահատում (լապարատոմիա):
Ընդհանուր և լապարասկոպիկ վիրաբուժության ծառայության ղեկավար Սևակ Շահբազյանի, վիրաբույժ Սերգո Սեդրակյանի, անեսթեզիոլոգ – ռեանիմատոլոգ Հովհաննես Գասպարյանի, սրտաբան Սերյոժա Սարգսյանի, վիրաբույժ Հարութ Կարապետյանի և հրավիրված կրծքային վիրաբույժ Գևորգ Ոսկանյանի համատեղ աշխատանքի և բարձր պրոֆեսիոնալիզմի շնորհիվ երիտասարդի կյանքը հաջողվել է փրկել:
Medmedia.am-ին Շենգավիթ բժշկակակն կենտրոնի Հանրային կապերի բաժնից հայտնեցին, որ այժմ հիվանդի վիճակը գնահատվում է կայուն ծանր, հավելյալ այլ վիրահատության կարիք դեռևս չկա:
