Այլ հիվանդությամբ գնում ես հիվանդանոց, կորոնավիրուսով վարակված վերադառնում ես տուն։ Կորոնավիրուսի տարածումից հետո այս արտահայտությունը բավականին հաճախ կարելի է լսել քաղաքացիների շուրթերից։ Շատ քաղաքացիներ ահազանգում են, որ տարբեր խնդիրներով այցելում են հիվանդանոցներ, ատամնաբուժարաններ, պոլիկլինիկաներ, իսկ տուն վերադառնալիս շատ քիչ ժամանակ անց զգում վիրուսին հատուկ սիմպտոմներ, ինչը շատերին թույլ է տալիս մտածել, որ վարակման օջախն իրենց համար հենց հիվանդանոցն է եղել։
Մեր խմբագրություն դիմել էր մի քաղաքացի, ով առողջական խնդիրներ է ունեցել սրտի հետ կապված։ Երևանյան հիվանդանոցներից մեկում սրտի ստենդավորում է արել։ Հիվանդանոցից դուրս գրվելուց հետո քաղաքացու մոտ հայտնվել են սիմպտոմներ, որոնք հատուկ են կորոնավիրուսին՝ բարձր ջերմություն, շնչահեղձություն։ Ինչից հետո քաղաքացուն հոսպիտալացրել են և պարզվել է, որ քաղաքացու մոտ կորոնավիրուս է հայտնաբերվել։ Վերջինիս պնդմամբ՝ իր սենյակում բացի բուժանձնակազմից և կնոջից ոչ ոք չի եղել և նա այլ տեղ չէր կարող վարակված լինել։
Այսօր էլ ԱԺ-ում Աշխատանքի և սոցիալական հարցերի նախարար Զարուհի Բաթոյանը նշեց, որ կասկածներ ունեն այն մասին, որ տարեցների տուն-ինտերնատ կորոնավիրուսի վարակը ներթափանցել է հիվանդանոց այցի պատճառով։
ՀՀ ԱԱՏՄ իրազեկման, խորհրդատվության և հանրության հետ աշխատանքի բաժնի պետ Լիանա Եղիազարյանը ArmDaily.am-ի հետ զրույցում նշեց, որ ոչ ոք հստակ չի կարող իմանալ՝ արդյոք վարակվել է հենց հիվանդանոցում, թե՝ ոչ.«Քաղաքացին կարո՞ղ է ներկայացնել տվյալներ, որ այդ պալատում բուժանձնակազմը չի պահպանել սանիտարական կանոնները։ Մանրամասները շատ կարևոր են, քանի որ քաղաքացին կարող է սիրողական եզրահանգումների գալ։ Եթե քաղաքացին նկատել է կոնկրետ խախտումներ, կարող է մեզ դիմել, և մենք դա հիմք ընդունելով մշտադիտարկում կիրականացնենք»։
Եղիազարյանը չբացառեց, որ վարակը կարող է լինել նաև հիվանդանոցներում.«Վարակն ամենուրեք էլ կարող է լինել։ Ինչ վերաբերում է բուժհաստատություններում սանիտարական նորմերի պահպանմանը, դրանց մասով պարետի որոշման մեջ հատուկ հավելված կա, որում սահմանված են անվտանգութան կանոնները և որոնցով բուժհաստատությունները պարտավոր են առաջնորդվել։ Այս ընթացքում տեսչական մարմինն այցեր է ունեցել բուժհաստատություններ։ Եղել են դեպքեր, երբ ստոմոտոլոգիական կենտրոնների աշխատանքն է կասեցվել, կամ որևէ լաբորատորիայի և այս այցերն ունեն շարունակական բնույթ»։
Հարցին՝ խոշոր ԲԿ-ներում խախտումներ արձանագրվե՞լ են, Լիանա Եղիազարյանը նշեց, որ եթե լինեն այդպիսի դեպքեր, տեսչական մարմինը դրանց մասին կհրապարակի։
Նյութի աղբյուրը՝ ArmDaily.am