Մասնագետների փաստմամբ՝ սեքսոլոգիական խնդիրները մեծամասամբ ենթարկվում են բուժման: «Նույնիսկ շատ կարճ ժամանակում կարող ենք արձանագրել բավականին գոհացնող արդյունք»,- նման տեսակետ MedMedia.am-ի հետ զրույցում նշեց ասաց Հայ-ամերիկյան առողջության կենտրոնի սեքսոպաթոլոգ, դոցենտ Սևադա Հակոբյանն ու ուրախությամբ շեշտեց, որ տարեցտարի մեծանում է սեքսապաթոլոգներին դիմողների թիվը, քանի որ մարդիկ արդեն ճիշտ են հասկանում, որ խնդիրները ոչ թե պետք է քողարկել, այլ՝ բարձրաձայնել և բժշկի դիմել:
«Մեր օրերում անպտղությունների դեքում հավասարապես դիտարկվում են և’ կինը, և’ տղամարդը: Տղամարդիկ ևս եկել են այն գիտակցությանը, որ անպտղության դեպքում պետք է ոչ թե կինը դիմի բժշկին, այլ զույգը»,-ընդգծեց բժիշկը:
Միջազգային փորձն, ըստ Սևադա Հակոբհանի, ցույց է տալիս, որ տղամարդու և կնոջ գործոնը անպտղության դեպքում գրեթե հավասար է 50-50% հարաբերակցությամբ․
«Իհարկե, 5-10% դեպքերն էլ լինում են չբացահայտված ծագումնաբանություն ունեցող: Զույգը պետք է հավասարապես պատասխանատվություն զգա անպտղությունը բուժելու առումով: Երբ թերապիայի է գնում զույգը, բուժումն ավելի արդյունավետ է լինում»,-մանրամասնեց զրուցակիցս:
Միջազգային պրակտիկայի համաձայն՝ ամուսնությունից հետո՝ մեկ տարի ժամանակահատվածում, երբ զույգը վարում է անպաշտպան և առանց բեղմնականխման սեռական կյանք, բայց կինը չի հղիանում, գրանցվում է առաջնային անպտղություն:
Բժշկի խոսքով, քիչ չեն նաև երկրորդային անպտղության դեպքերը. «Երկրորդային անպտղության հիմնական պատճառները ստրեսոգեն գործոնները, հորմոնալ խախտումներն ու բորբոքային գործընթացներն են»:
Հարկ է ընդգծել, որ անպտղության առկայությունը խիստ մտահոգիչ է տղամարդու համար․
«Անպտղությունը տղամարդու համար կարող է լինել հավասարազոր ցավալի, որքան մոտ հարազատի կորուստը»:
Բուժման առումով որոշակի խնդիրներ է առաջացնում այն հանգամանքը, որ զույգին պարտադրում են սեռական հարաբերություն ունենալ ցիկլի կոնկրետ օրերին, երբ մեծ է հղիանալու հավանականությունը:
«Բազմաթիվ հետազոտություններ ցույց են տալիս, որ հենց այս գործոնը ազդում է տղամարդու վրա: Անպտղության բուժման հիմնական ընդհատումները լինում են այն պատճառով, որ զույգի մոտ նկատվում են նաև սեքսոլոգիական խնդիրներ, ինչի կարգավորման համար հարկավոր է նաև սոիոլոգիական միջնորդություն»,-եզրափակեց մասնագետը:
Տաթև Առաքելյան