Ձեզ անհանգստացնում են թուլությունը, տենդը, գլխացավը, ձայնի փոփոխությունը, կոկորդի ցավն ու հազը, ապա հավանականություն կա, որ Ձեզ մոտ զարգանում է սուր լարինգիտ: Իսկ թե ո՞րն է այս խնդրի առաջացման պատճառը MedMedia.am-ը տեղեկացել է «Արթմեդ» բժշկական վերականգնողական կենտրոնի փոխտնօրեն, Օտորինոլարինգոլոգ բ.գ.թ. Արայիկ Ղարիբյանից: «Սուր լարինգիտի պատճառ հաճախ հանդիսանում են գրիպի վիրուսները և ադրենովիրուսները»,-ասաց ԼՕՌ մասնագետն ու շեշտեց, որ խնդրի առաջացման խթանիչ կարող են լինել նաև բակտերիաները: Ըստ նրա՝ դրանք կարող են լինել պայմանական պաթոգեն միկրոօրգանիզմներ, որոնք առաջացնում են հիվանդությունը միայն այն ժամանակ, երբ լորձաթաղանթի պաշտպանիչ գործառույթները նվազում են: «Երբեմն սուր լարիինգի պատճառը դառնում է կոնկրետ բակտերիալ վարակ, օրինակ, դիֆթերիայի բակտերիաները»,-նշեց զրուցակիցս: Վերջինիս խոսքով՝ քիչ չեն դեպքերը երբ խնդիրը զարգանում է սնկերի պատճառով: «Կանդիդոզ լարինգիտը կարող է առաջանալ, որպես ինհալացիոն կորտիկոստերոիդներով երկարատեւ բուժման բարդություն, ինչպես նաև հակաբիոտիկների օգտագործումից»,-ասաց Արայիկ Ղարիբյանը:
Շարունաելով միտքը՝ բժիշկն առանձնացրեց նաև ձայնալարերի ծանրաբեռնված աշխատանքը, որը հաճախ հանդիպում է ուսուցիչների, երգիչների մոտ` այսպես կոչված «դասախոսության» լարինգիտ անվանումով: «Հարկ է պատճառների մեջ նշել նաև ծխելը, խոնավ, ցուրտ եղանակը, սառը հեղուկների, պաղպաղակի օգտագործումը»,-ընդգծեց ԼՕՌ բժիկը:
Տաթև Առաքելյան
