ԱՄՆ-ում կորոնավիրուսային համավարակի ողջ ընթացքում ամենամահաբեր օրը եղել է ապրիլի 30-ը։ Այդ օրը 24 ժամում մահացել է 2909 մարդ։ Մոտավորապես այդքան կորուստ երկիրն ունեցել էր 2001 թվականի սեպտեբերի 11-ին Նյու Յորքում տեղի ունեցած ահաբեկչության ժամանակ։ Այդ ժամանակ մահացել կամ անհետ կորել էր 2973 մարդ, հայտնում է VOA-ն։
ԱՄՆ-ում մահացության դեպքերի աճը դիտվում է մի քանի նահանգներում բիզնեսի աշխատանքի մասնակի վերսկսմանը զուգահեռ։
Վերջին շրջանում երկրում բողոքի ալիք է սկսվել ընդդեմ կարանտինային միջոցառումների։ Բողոքի ամենաաղմկոտ ակցիաները տեղի են ունեցել Կալիֆոռնիայում, Կոլորադոյում, Իլինոյսում, Նյու-Ջերսիում, Թեննեսիում, Նյու Յորքում և Ֆլորիդայում։
Մասնագետները նշում են, որ կորոնավիրուսից մահացածների թիվը կարող է պաշտոնական տվյալներից ավելին լինել, քանի որ շատ պացիենտներ մահանում են տանը, և նրանց չեն ներառում վիճակագրության մեջ։