Գնալով` կեսարյան հատումը դառնում է ծննդօգնության ավելի ու ավելի տարածված մեթոդ, սակայն այն այնուամենայնիվ վիրաբուժական միջամտություն է, ինչը կրում է որոշակի ռիսկեր թե՛ մոր, թե՛ երեխայի համար, առավելևս, երբ կատարվում է անհարկի:
Մանկաբարձ-գինեկոլոգ Եվա Չիչոյանի խոսքով գոյություն ունեն մի շարք ցուցումներ, որոնց առկայության դեպքում արվում է կեսրայան հատում.
« Կեսարյան հատման ցուցումներից են՝ III և IV աստիճանի նեղ կոնքը, կոտրվածքների և այլ պատճառներով խիստ փոքրացած չափեր և փոփոխված ձև ունեցող կոնքը (ասիմիլացիոն, սպոնդիլոլիստետիկ, օստեոմիելիտիկ և այլն), միզապարկի քարերը, որոնք շրջափակում են փոքր կոնքը, կոնքի ուռուցքները, պարանոցային միոմաները, ձվարանների, միզապարկի ուռուցքները, որոնք շրջափակում են ծննդաբերական ուղիները և այլն: Սրանց առկայության դեպքում բժշկի անմիջական հսկողության և ցուցման պարագայում արվում է կեսարյան հատում»,- ասում է նա:
Մասնագետի խոսքով բնական ճանապարհով ծննդաբերությունը մնում է ամենանախընտրելի տարբերակը՝ բարդությունների բացակայության դեպքում:
Կեսարյան հատումը հիմնականում իրականացվում է հղիության 39-րդ շաբաթից հետո, երբ երեխան լիովին զարգացած է և կենսունակ: Երբեմն հարկ է լինում ծննդօգնության նման տարբերակի գնալ ավելի վաղ շրջանում՝ ելնելով առողջական ցուցումներից:
2017 թվականին ՀՀ-ում ծնվել է 37 հազար 841 երեխա, որից 11 հազար 539-ը՝ կեսարյան հատումով: Այսինքն, կեսարյան հատումների թիվը հանրապետությունում կայուն կերպով աճում է ,և եթե 90-ականներին այն կազմում էր ծնունդների 3,4 %-ը, ապա այսօր ցուցանիշը գերազանցում է անգամ 30%-ը:
Լատինական Ամերիկայում՝ Մեքսիկայում, Բրազիլիայում, թվերը շատ բարձր են՝ մոտ 40-50 տոկոս: ԱՄՆ-ում նույնպես շատ բարձր ցուցանիշներ են`32 %: Թուրքիայում վերջին տարիներին ծննդաբերությունների 50 %-ը կեսարյան հատմամբ են իրականացվում:
Կեսարյան հատման ցուցանիշները համեմատաբար ցածր են Իսրայելում Նիդերլանդներում և Շվեդիայում(15%-16%): Ֆրանսիայում կեսարյան հատումը ծննդաբերությունների 20% է կազմում, Գերմանիայում`30%-ից ավելի:
Հարկ է նշել նաև, որ կեսարյան հատման ավելի բարձր ցուցանիցներ գրանցաց երկրներում հաճախադեպ են նաև ծննդկանների և նորածինների մահերը:Իմանալով այս ամենը` յուրաքանչյուր մայր պետք է կատարի ճիշտ ընտրություն իր փոքրիկի համար. կյանքի բնականո՞ն, թե՞ հատվող սկիզբ:
Կեսարյան հատումը կարող է առաջացնել բազմաթիվ բարդություններ՝ կպումներ, հետվիրահատական ճողվածքներ, վերքի ինֆեկցում, հաջորդ հղիության ընթացքի բարդացման հավանականության մեծացում: