Տեսողության հետ կապված խնդիրները բազմաթիվ են և դրանց առնչվում են ինչպես մեծահասակները, այնպես էլ ՝ երեխաները։ Աստիգմատիզմի մասին մենք զրուցել ենք ակնաբույժ Թամարա Մկրտչյանի հետ, պարզել ենք, թե ի՞նչ է այն, ի՞նչ ախտանշաններ ունի և ինչպե՞ս է հնարավոր այն բուժել։
— Ի՞նչ է աստիգմատիզմը։
— Աստիգմատիզմն իրենից ներկայացնում է աչքի ռեֆրակցիոն խնդիր, ինչպիսին կարճատեսությունը կամ հեռատեսությունն են: Աստիգմատիզմի պատճառը եղջրաթաղանթի կամ առավել հազվադեպ ոսպնյակի մակերեսի կառուցվածքային փոփոխություն է։ Եթե նորմայում եղջրաթաղանթը (աչքի առաջային թափանցիկ հատվածը) գրեթե իդեալական սֆերիկ է և նրա բոլոր կետերում լույսը նույն ուժգնությամբ է բեկվում, ապա աստիգմատիզմով պացիենտների մոտ կառուցվածքային փոփոխությունները բերում են նրան, որ եղջրաթաղանթի մի հատվածում լույսը ուժեղ է բեկվում, մյուսում՝ թույլ:
— Ի՞նչն է աստիգմատիզմի առաջացման պատճառը։
— Այս պաթոլոգիան հիմնականում ժառանգական բնույթ է կրում` բնածին է, սակայն կարող է լինել նաև ձեռքբերովի` օրինակ տրավմայի կամ ակնային վիրահատության հետևանք:
— Քանի՞ տեսակի աստիգմատիզմ է տարբերակվում։
— Եթե նշենք աստիգմատիզմի հիմնական տեսակները, դրանք են` կարճատեսային, հեռատեսային և խառը:
— Որո՞նք են աստիգմատիզմի ախտանիշները։
— Սիպտոմներն են մշուշված, լղոզված տեսողությունը, պատկերները կարող են որևէ ուղղությամբ ձգված թվալ կամ ստվերներով: Այս պացիենտները հիմնականում դժվարանում են երեկոյան մեքենա վարել և կարող են ունենալ գլխացավեր, ոչ հստակ տեսողության պատճառով:
— Ինչպե՞ս է բուժում աստիգմատիզմը։
— Ինչպես ցանկացած ռեֆրակցիոն խնդիր, աստիգմատիզմը ուղղվում է ակնոցներով, լինզաներով կամ էքսիմեր լազերային վիրահատության միջոցով:
— Հնարավո՞ր աստիգմատիզմը զուգորդվի տեսողական այլ խնդիրների հետ։
Աստիգմատիզմին բնորոշ չէ որևէ ակնային հիվանդության հետ հատուկ կապը, սակայն այն ևս կարող է ուղեկցվել ակնահատակի փոփոխություններով, այդ իսկ պատճառով տարին մեկ անգամ անհրաժեշտ է անցնել ակնահատակի զննություն ակնաբույժի մոտ:
Լուսինե Մարդոյան